Carballo no espello

Falamos dese Carballo que se esconde detrás dos valados que ocultan outros valados. Esa parte de nós que resultaba demasiado difícil de afrontar, demasiado dolorosa, e que un día preferimos ignorar, enmascarar, mirar cara a outro lado, pensar que non existía, para poder ofrecer un cara máis amable, máis moderna, máis aceptable… esa parte de nós está oculta, pero segue viva. E de vez en cando sae á luz para reventarnos nos fuciños e recordarnos a nosa realidade.

Falamos da recente detención dun dos delincuentes máis buscados da capital de Bergantiños, un mozo que con 21 anos acumulaba xa un historial delictivo propio do Vaquilla. E máis concretamente, de todos os acontecementos inusuais que rodearon a detención, coa participación de reforzos policiais, apoio aéreo dun helicóptero, e co enfrontamento entre as forzas da orde e os seus familiares e amigos do Sixto. Aspectos que fixeron unha vez máis que Carballo ocupase portadas de medios de tirada autonómica dando unha pésima imaxe. Unha realidade que hoxe completa o BOE, por unha vez na súa verdadeira función xornalística, dando conta da dramática situación de miseria que se vive nos poblados moinantes de Carballo e Coristanco por mor dunha crise que dun xeito ou outro acaba por afectar a todos. Das 120 toneladas de alimentos repartidos por concellos e ONG’s entre os máis necesitados de toda a Costa da Morte, case a metade foi para Carballo.

Por iso, cando nos decatamos de que non somos esa cidade moderna do futuro que moitos pensan, senón que a uns centos de metros da praza do Concello habita a pobreza máis desesperante, é momento de actuar. E actuar significa tomar conciencia dos problemas de marxinalidade que temos, expoñelos, non ocultalos, e afrontalos. Ou cando menos intentalo. Porque se o que decidimos e voltar a tapar todo, tirar para adiante coma se nada, daquela os problemas non van desaparecer senón que van medrar. E periódicamente voltarán a saír a luz, aumentados. E se cadra chegará un día no que sexa demasiado tarde e non haxa nada que facer.

Seguir lendo...