O 2005: “annus horribilis” para a seguridade en Bergantiños

Se ben a seguridade é unha das asignaturas pendentes da nosa comarca dende hai anos, este ano 2005, así como o anterior 2004, téñense convertido en auténticos “annus horribilis”.

Atracos, butróns, roubos tradicionais, e os espectaculares alunizaxes, son nestes momentos o pan noso de cada día na prensa e nas tertulias locais, que inexorablemente repiten os mesmos lamentos e a mesmas demandas.

Pese a ser unha promesa histórica...

de tódolos grupos políticos, o retorno da Policía Nacional a Carballo non ten trazas de realidade. E mentres tanto, tódolos cidadáns, e sobre todo os pequenos e medianos empresarios e comerciantes, teñen que botarse a temblar cada noite e cada fin de semana.

Este non é só un problema de seguridade persoal e do patrimonio que en cada caso se sustrae, senón da seguridade xurídica e da confianza imprescindible para que os inversores poidan fixarse na nosa comarca. Se os nosos concellos son coñecidos polos roubos que sofren, e non polo carácter emprendedor das súas xentes, será moito máis difícil tanto que a nosa xente arrisque os seus cartos nunha empresa, como que os empresarios foráneos veñan aquí a crear postos de traballo. Sen seguridade e garantías legais, o progreso non é posible.

Agardamos que o novo goberno da Xunta se preocupe por Bergantiños e cumpra coa promesa de mellorar a súa seguridade, porque motivos non faltan.