Periga a construcción de vivendas en Carballo?

Nunha interesante reportaxe, LVDG pon enriba da mesa un delicado asunto que pode causar certos quebradoiros de cabeza en datas vindeiras, na campaña electoral, ou no próximo mandato.

Resulta que ó abeiro de toda a polémica que nos últimos meses se está suscitar en toda España, e tamén na Costa da Morte, sobre o boom inmobiliario, o prezo da vivenda, e a ocupación do litoral, a Xunta pretende aplicar un norma segundo a cal un Concello non poderá conceder licenza para máis de 500 vivendas ó ano.

Como poderedes imaxinar, Carballo supera esta cifra, ó igual que A Laracha, e por moito máis Malpica. O curioso é que esta frenética construcción de pisos, que a Xunta considera equivocada e polo tanto motivo de regulación, foi anunciada coma un éxito por parte do alcalde carballés e motivo de certa polémica coa oposición. Semella que os puntos de vista da administración local e autonómica son ben distintos, mesmo cando están gobernadas polos mesmos partidos.

Pola nosa parte, non entendemos que sentido ten que un goberno autonómico poña trabas ó crecemento dunha vila se existe demanda de pisos, pero está claro que se unha norma se aproba debe ser aplicada en todas partes, sen excepcións. Veremos qué sucede.