Continúan as reaccións ó Plan da Consellería de Vivenda

Falabamos diso no noso anterior post e as reaccións ó Plan Sectorial de Vivenda do BNG non paran de producirse, e con novidades importantes.

Seguindo coa situación doutros concellos, os veciños de Cambre veñen de sumarse ós de Arteixo na súa solicitude de abandoar o proxecto estrela de Táboas e Quintana, mentres que en Lugo (tamén PSOE) as augas baixan turbias e complicadas, e a recente visita do delegado na materia non rematou precisamente con palabras cordiais.

Así as cousas, o pasado venres o PP de Carballo ampliaba información en rolda de prensa. Concretamente o principal grupo da oposición poñía cifras enriba da mesa para denunciar o que consideran unha política expropiatoria: o Plan Sectorial contempla pagar 49,18 € por metro cadro de solo expropiado (60 € por metro cadrado no caso das vivendas que xa existen no sector, que habería que demoler expulsando ós seus propietarios). Un prezo ridículo en comparación co que estas parcelas valen no mercado, e que xa ten provocado a protesta cando menos dun dos propietarios afectados, que nas páxinas do Diario de Bergantiños tiña palabras moi duras para o goberno. Sobre todo se temos en conta que ademais a Xunta non vai proceder a construir vivendas de protección, senón solamente a urbanizar o solo para logo vendelo a promotores privados, aspecto que segundo este afectado convirte á Administración autonómica nun especulador urbanístico.

Por se iso fora pouco o PP facía tamén referencia ó escandaloso antecedente do polígono industrial de Bértoa, onde -coa mediación do alcalde- se lles ofrecía coma prezo de expropiación ós propietarios un valor moi baixo, que moitos deles aceptaron. Mentres, aqueles que non se fiaron do alcalde e presentaron recurso, acabaron por conseguir cantidades que multiplicaban por tres a oferta inicial da Xunta.

Vendo cómo se están a poñer as cousas, non dubidamos en que pronto serán moitos os propietarios do entorno da Vila de Negreira en levantarse ante esta inxustiza. E por outra banda preguntámonos, ¿cómo é que o señor Viña (PSOE) non segue o exemplo dos seus compañeiros de partido noutros concellos? E xa que no goberno a ninguén lle importan os seus veciños, e só os intereses dos seus partidos, ¿a qué espera o PP para ofrecer máis e mellor información ós afectados?