Novo goberno autonómico

Pouco a pouco van chegando as novidades do novo goberno da Xunta que vai presidir Núñez Feijóo. O hermetismo está a caracterizar o nomeamento de futuros conselleiros e altos cargos, e todo o máis que sabemos son as quinielas que se barallan nos medios e nas que non figura ninguén orixinario da nosa zona.

Sen embargo, no día de onte houbo novidades cando se deron a coñecer os nomes dos representantes nas comisións parlamentarias. O voceiro do PP carballés, Alberto Sueiro, será presidente da comisión de Industria e tamén vicepresidente da de Economía, comisión que por tradición se lle deixa presidir á oposición. E ata aquí sabemos e podemos ler, que diría Mayra.

Así pois, responsabilidades importantes para Sueiro, que será o representante do goberno nas dúas comisións a priori máis importantes habida conta do contexto económico. Agardemos que o carballés poña da súa parte para solventar o desastre absoluto na política de polígonos industriais do goberno saínte: despois da polémica polos prezos en Carballo, outro tanto está a suceder en Malpica, e en Vimianzo, co polígono rematado, o concurso para adxudicar parcelas ven de quedar deserto. Seguiremos atentos ós acontecementos e nomeamentos de vindeiras datas.