Invencible

Xai hai un tempo que fixeramos notar a discrepancia existente entre a concellería de Educación de Carballo (BNG) e a Consellería de Educación de Galicia (PSOE) no tocante ós terreos do colexio Bergantiños. Namentres que os mandatarios locais aseguraban ter todo atado e comprometido para construir neles unha nova gardería que adoptaría o formato das galescolas de Quintana, os mandatarios autonómicos estaban a estudar unha posible ampliación das actuais instalacións que Evencio Ferrero rexeitaba, pois apostaba pola construcción dun novo edificio. A indefinición da Xunta provocaba, segundo a versión oficial, a falta de desafectación dos terreos e o retraso da gardería.

Pois ben, o dilema ven de dirimirse coa aparente derrota local, porque a Delegación de Educación ven de anunciar que vai ampliar o Bergantiños para responder á demanda de educación primaria en Carballo (que se prevé nuns 200 rapaces), probablemente cun novo edificio independente do existente pero dentro do mesmo recinto. Unha boa noticia a priori, que agardamos se faga realidade axiña porque en efecto o problema do ensino se ten tornado nunha das nosas maiores preocupacións. Mais unha noticia que trae un reverso negativo, porque sempre segundo as informacións que se teñen publicado, esta ampliación imposibilitaría ou dificultaria a construcción da gardería, que xa acumula varios anos de espera.

E no noso afán de mirar sempre debaixo da corteza informativa chámanos terriblemente a atención cómo se ten enfocado a noticia na prensa local. Nin unha soa referencia ó proxecto da galescola que cabe supoñer se atopa agora cun grave obstáculo, e un aparente acordo total e éxito das dúas administracións, sen mención algunha ás diferenzas de parecer que existían en canto ó destino dos terreos do colexio Bergantiños. Polo que semella, o equipo de Ferrero ou non perde nunca, ou non pode perder, ou se perde deberá parecer que gaña.