O póker do PXOM

“Peligra el consenso sobre la revisión del PXOM carballés”. Ese era o titular desta semana despois do cruce de declaracións dos portavoces locais en torno á tran traída, levada, retrasada, postergada, novamente retrasada, aprazada, e nunca realizada revisión do plan xeral de urbanismo. Desta vez pasaremos dos antecedentes, porque mil veces os repetimos en multitude de posts ó longo destes anos, así como das perigosas consencuencias que se poden pola carencia dun documento actualizado e legal.

O caso é que a cercanía das eleccións ven de reventar o tradicional acordo e colaboración entre os dous grupos do goberno e os dous da oposición. E os nosos medios de comunicación convencionais teñen, como de costume, tomado partido polos primeiros, presentando a ruptura coma unha estratexia política dos segundos, e resaltando o enésimo compromiso do goberno local de sacar adiante o documento. Pola nosa banda, afeccionados coma somos a rascar un poco máis aló da superficie, cremos que a análise é incompleta e superficial.

Porque esta partida de póker (ese é o símil máis apropiado), fai moito que comezou. Moito antes incluso de que as eleccións aparecesen no horizonte. Trátase dun partida coma as das películas, con grandes farois e moito en xogo. Unha partida na que o tándem Evencio-Viña xogou ó despiste durante anos facendo crer ós seus opoñentes e a todos os cidadáns, que estaban a apostar pola aprobación do Plan cando na realidade estaban a apostar xustamente por todo o contrario, por paralizalo o máximo tempo posible, ou cando menos salvar as eleccións. Só así se pode explicar que unha simple revisión iniciada xa na primeira metada da anterior lexislatura, cando Andrade era o concelleiro de urbanismo, non teña pasado aínda nin unha aprobación inicial nin unha información pública. Cousa por outra parte entendible, se temos en conta que o novo Plan Xeral saínte da revisión vai reducir máis as posibilidades edificatorias, non vai deixar contento a ninguén, e vaille costar moitos votos ó goberno de turno. Tal e como lle sucedeu no ano 2003 a Manuel Varela… ou peor. Falamos polo tanto dun farol que a oposición tragou, quixo tragar ou aparentou tragar, durante anos, se cadra temerosos de que unha postura contraria puidese acarrearlle unha imaxe negativa. Pero cando o tempo da partida se esgota e chega a hora de mostrar as cartas, chega o momento de tomar decisións. E tanto o PP coma TEGA, con argumentos e discursos diferentes, están a facelo, atacando ó alcalde e denunciando o retraso deliberado do Plan. E neste punto asistimos á resposta planificada do equipo de goberno, prometendo que aprobarán o documento de forma inicial antes das eleccións. Pero como xa todos imos tendo experiencia nesto do póker e xa temos vivido bastantes partidas, sospeitamos que na baralla pode haber cartas marcadas. Por exemplo, podería ser que o goberno aprobase o plan de forma inicial sen atender ós criterios da Xunta e organismos superiores, ou no caso de telo atendido, sen expoñelo ó público. De feito, hoxe mesmo Viña advirte que non se van facer copias do Plan, e que o acceso será restrinxido. Desa forma, o bipartito podería apuntarse na prensa ter preparado a revisión do plan… sin perder votos porque ninguén podería coñecela. ¿Canto apostamos?