…pero onde foron os cartos?

Esa é a pregunta. O Concello de Carballo ten ou non ten cartos? Cántos ten? Ónde foron parar as grandes inversións dos orzamentos record de todos estes anos? Estas preguntas poden sorprender, afeitos como estabamos a escoitar falar da saúde de ferro das finanzas carballesas, así como das cifras cada vez máis altas que o goberno bipartito manexa cada ano. Pero nos últimos meses teñen acontecido varias circunstancias e varios datos que resultan inquedantes e que evidencian que algo vai mal.

A primeira chegou a principios do ano 2010. Por primeira vez na historia, o Concello tiña un “remanente de tesorería” negativo. A segunda chegou en forma de rumores: comentarios crecentes de que Carballo, que antes era un moi bo pagador, xa non era tan bo pagador, e que moitos empresarios pasaban serias dificultades para cobrarlle as facturas. A terceira chegou dende a Deputación: resulta que o organismo provincial da cada ano unhas subvencións para facer obras e servicios, pero o Concello tivo que destinar parte de eses cartos non a facer obras, senón a cubrir os gastos correntes; un truco consentido e practicado por algúns concellos en apuros, pero que nunca antes sucedera na capital de Bergantiños. A cuarta chegounos en forma de sospeita de parte dos mal pensados: o BOE publicaba unha serie de reportaxes sobre a saúde financiera dos concellos da Costa da Morte... pero Carballo non figuraba. Tamén pode sumarse no haber a non-celebración do pleno do mes de decembro que o alcalde decidiu unilateralmente fumarse, porque “son datas para estar coa familia”. E a quinta e máis significativa chega en forma do principal documento que cada ano ten que aprobar un concello: Evencio Ferrero aínda non aprobou o presuposto deste ano e non se sabe cando o fará.

Naturalmente a oposición do PP non perdeu oportunidade de denunciar a situación. Recordan os populares que no ano 2001, cando Manuel Varela estaba en minoría, Ferrero consideraba que o retraso na aprobación dos orzamentos eran “unha proba da incapacidade do goberno municipal”. O grupo de Sueiro tamén denuncia que se pretende ocultar a situación económica do Concello (fai un paralelismo Evencio=Zapatero), e sospeita que o motivo último é “dar manga ancha ó concelleiro de obras para gastar sen ningún tipo de control nos meses anteriores ás eleccións”.

En calquera caso, sospeitas aparte, o que está claro é que as cousas non están funcionando como deberían, que hai problemas cos cartos, e que nolo están intentando ocultar. E o que é máis grave, esta situación ven despois de varios anos dun gasto desaforado (do que ademais o alcalde presume sempre que ten ocasión), nos que se teñen aprobado presupostos espectaculares que despois moitas veces non se cumpriron, e nos que se teñen gastados millóns e millóns e millóns de euros en cuestións moitas veces cuestionables, sen que se teñan dado resposta ós principais problemas de Carballo. Por todo iso é imprescindible que se nos dea a todos unha explicación detallada de ónde foron e de cómo están os nosos cartos. Porque, recordémolo, son NOSOS, non seus.