Máis UPG

Foto: Anosacosta

De madrugador pode calificarse ó BNG de Carballo. Esta fin de semana Evencio presentaba ós once primeiros da lista cos que a formación frentista concorrerá ós vindeiros comicios municipais de maio.

E como cabía agardar as sorpresas son escasas. Catro novidades con respecto á lista de hai 4 anos, dous mozos vinculados ó deporte e á normalización lingüística que chegan dende Galiza Nova, e dous veteranos con moitos anos de traxectoria política no benegá: Milagres Lantes e Xosé Regueira.

Dous datos chámannos a atención. O primeiro, que o alcalde carballés prantexa as eleccións coma a decisión entre unha alternativa de esquerdas co BNG en maioría absoluta ou en bipartito co PSOE, e unha alternativa de dereitas cun bipartito PP-TEGA. Coma se non fose posible unha maioría do PP, ou coma se el non tivera pactado xa con Andrade, e o devenir do resultado non lle puidese plantexar de novo esa alternativa.

O segundo dato apórtao A Nosa Costa facendo unha reflexión en clave interna. Dentro dos equilibrios internos do BNG, coa bicefalia Aymerich-Vázquez, e as loitas entre a Unión do Povo Galego e os aperturistas de Máis Galiza, a nova lista electoral do Bloque destaca pola incorporación de dous pesos importantes do partido nacionalista máis radical, a UPG de Bautista Álvarez. Un partido ó que tamén pertence Evencio Ferrero e que moitas veces foi tildado de trasnoitado.

A tal efecto tomámonos a molestia de visitar a súa web e coñecer ós seus estatutos, a ver se realmente a cousa é para tanto. Limitámonos a reproducir literalmente, e que cada un saque conclusións:

Artigo 1
A UPG, fundada en 1964 é un partido que defende prioritariamente os intereses de todas as clases traballadoras da nosa nación. A UPG é un partido comunista patriótico, porque asume a loita de liberación nacional, na perspectiva da instauración dun Estado galego democrático popular, para rematar coa colonización que padece o país, como paso indispensábel para a construcción do socialismo.
[…]
Artigo 3
A U.P.G., fundamenta o seu programa e guia a sua acción política nos princípios do Materialismo Histórico e da Dialéctica, aplicando-os criativamente ás condicións concretas de Galiza. Partindo das realidades do noso próprio país., o Partido toma en consideración a experiéncia histórica do movimento obreiro e anti-imperialista internacional e emarca a sua teoria e prática nos princípios ideolóxicos e políticos de Marx, Engels e Lénin, ao tempo que incorpora o ideário político de Castelao e dos precursores do nacionalismo galego, que loitaron pola consecución dunha pátria soberana e liberada da opresión nacional.
Artigo 4
A U.P.G., como partido nacionalista galego, considera que o inimigo principal do povo galego é a burguesia monopolista española, que domina o aparatao do Estado, através do cal, contando coa colaboración da burguesia intermediária interna, mantén unha opresión capitalista colonial en Galiza. Por tanto, na presente etapa histórica, cando no proceso revolucionário internacional o antagonismo principal se manifesta nas loitas das nacións e dos povos oprimidos, colonizados e dependentes contra o imperialismo internacional, a estratéxia e táctica da U.P.G., están orientadas a potenciar o Movimento Nacionalista Galego contra o imperialismo español e os seus aliados na Galiza, considerando o que esta é unha loita anticolonial e antimonopolista, especialmente dirixida ao corazón do imperialimso occidental e as suas estructuras políticas, económicas e militares.