Sísamo debe esperar

Non están os tempos como para deixar pasar os cartos, e menos cando son para obras xustas. Ese é o pensamento da meirande parte dos veciños de Sísamo. Tal e como denunciaba días atrás o PP e hoxe recoñece o goberno, o proxecto para acometer a travesía de Sísamo por parte da Deputación leva oito meses de retraso, e non ten fecha de inicio. Tanto é así que moitos sospeitan que a obra non se vai facer. Un feito lamentable sobre todo se temos en conta que levamos máis de 5 anos oíndo falar dela.

Retrasos de tramitación aparte, parece ser que o principal escollo ven polo desacordo entre o Concello e maila Deputación. Unha mostra máis de que a mesma cor política entre administracións non garantiza nada (nos dous organismos hai bipartitos BNG-PSOE). Evencio Ferrero seguramente lembrara hoxe a súa famosa frase de “non hai gobernos amigos, hai gobernos eficaces”. A cuestión é que no proxecto aprobado polo organismo provincial a calidade dos pavimentos non é coma a que o goberno local ten aplicado noutras obras do concello. E ese cambio de pavimento implica un sobrecoste que agora ninguén semella estar en condicións de asumir, e polo tanto, todo parado. Dedúcese que alguén debeu de cavilar que mellor decir que a obra se retrasa a facela deixando disconformes ós veciños, porque os agravios entre parroquias sempre son odiosos, e en época electoral máis aínda. Noutra nova paradoxa, neste caso non funciona o bálsamo electoral, máis ben ó contrario a proximidade dos comicios retrasa unhas obras que están aprobadas e que os veciños de Sísamo e do San Cristovo levan anos agardando.

Claro que nós non podemos deixar pasar a oportunidade de lembrar que a de Sísamo non é a única travesía comprometida hai anos e que están sen empezar. Hai máis de 8 anos que se firmou un convenio para urbanizar a travesía principal de Carballo, e máis de 6 que se remataron a primera e a segunda fase. Da terceira fase, nunca máis se soubo.