A caída das vallas

Moitas veces falamos en CD sobre da realidade carballesa que se ocultaba “detrás das vallas” publicitarias. Esa parte de nós que non forma parte do discurso oficial, que non aparece nos medios convencionais, esa parte que algúns, ou se cadra moitos, coñecen, pero que da que ninguén fala. Ou mello dito, falaba. Porque a proximidade dos comicios municipais do mes de maio está a eliminar unha por unha todas esas barreiras e pouco a pouco os problemas longamente larvados e soterrados debaixo das alfombras van saíndo á luz.

Primeiro foi a controversia sobre o reparto de axudas económicas no deporte, e particularmente as acusación de trato de favor á sección de balonmán de Xiria. Unha situación denunciada pola sección de baloncesto. Máis tarde os policías, que xa no pasado amosaran a súa disconformidade co concelleiro responsable e cos seus mandos, voltaban á carga contra o goberno municipal. Por primeira vez os funcionarios sacaban á luz pública o segredo a voces do seu cabreo co alcalde por mor da organización do traballadores, e mesmo se reunían coa oposición para trasmitirllo. Simultáneamente os veciños do San Cristovo voltaban a protestar pola situación do seu barrio e concretamente pola paralización da travesía de Sísamo. E tamén saían a luz o informe negativo de Sanidade sobre os postos do mercado, o abandono dos automóviles da DXT, as carencias do informe de seguridade, ou os retrasos nos pagos a proveedores. Situacións que na súa maior parte eran ben coñecidas e comentadas por moitos cidadáns pero que ata o de agora se mantiñan ocultas, detrás dos valados; e que ademais veñen a estropear esa imaxe de “aquí non pasa nada”, e “Carballo vai ben” que Evencio Ferrero tanto se esforza en vender, evitando entrar ó trapo de ningunha polémica.

Tanto é así que semella que os nacionalistas teñen captado a mensaxe de que esa súa política ata o de agora pode resultarlles perigosa. E así, a semana pasada no parlamento de Galicia o BNG, contra todo pronóstico, contraatacaba retomando un vello slogan a dous meses das eleccións. ¿Adiviñan? Efectivamente, os nacionalistas solicitaban á Xunta… autovía gratuíta entre a Coruña e Carballo. As vallas están a caer, e podemos atopar con moitas sorpresas detrás.