Nazón de Breogán

Ese é o título dunha exposición que Anxo Quintana vai inaugurar na planta superior do Pazo da Cultura o próximo día 10 ás 20:00 horas. A exposición, cuxo contido concreto aínda descoñecemos, vai ter por obxecto “render homenaxe ós galeguistas que traballaron polo autogoberno”, poñer de relevo a “singularidade” de Galicia, e implicar á sociedade no proceso de “consecución dun novo estatuto”… de “nazón”, por suposto, como di o título da iniciativa.

Visto o anterior, todos pensaredes que estamos ante un acto organizado polo BNG para expoñer o seu punto de vista da reforma do estatuto. Pois non, é un acto organizado e pagado pola Vicepresidencia da Xunta (“o departamento de Anxo Quintana”, como ben repite a propaganda institucional) en colaboración co Concello de Carballo de Evencio Ferrero. Unha precisión, a exposición non a paga Quintana, como algúns poderán pensar, pagámola todos nós cos nosos impostos. Claro que no caso do alcalde carballés, tendo en conta a súa famosa honradez, a ben seguro que os gastos municipais sairán das contas do partido.