O gordo!!!

(Foto: A Nosa Costa)


Moito temos falado de sambenitos, malas famas e falta de referentes en Carballo. Mais contra todo pronóstico, a fortuna quixo en apenas un mes a nosa cidade saltase á primeira páxina dos medios nacionais por motivos positivos. Hai quince días era o éxito de Róber Bodegas no "Rey de la comedia", e hoxe espertámonos coa nova máis espectacular do ano: o gordo na lotería do Nadal cae en Carballo.

Foi a administración da rúa da Estrela a encargada de vender nada menos que 15 series do nº 06381, e o bar Arco Iris, que levaba anos xogando a este número, era hoxe un dos escenarios de ledicia máis desbordada. Moitas foron as televisións e medios de comunicación nacionais que chegaron a Carballo a cubrir a nova, e moitos os nosos veciños que puidemos ver nos noticiarios de mediodía das principais canles celebrando con champán e bágoas o reparto do multimillonario gordo.

Pagar hipotecas e viaxar eran as intencións da maior parte dos premiados, que coincidían en que non ían poder deixar de traballar, pero felicitábanse pola súa sorte e polo repartido do premio. A isto queremos engadir nós outro dato importante: moitos carballeses con cartos son unha gran noticia para os demais carballeses ós que non lles tocou nada, pois supón un aumento de poder adquisitivo e de consumo para os nosos comerciantes e empresarios, e un impulso inesperado para a nosa economía local.

Así pois, doble motivo de felicidade. Noraboa ós premiados e feliz Nadal a todos.

Actualización: Non vos perdades a noticia comentada por Rober Bodegas (vía comentario anónimo neste post)