Contratos confusos

Non sabemos se foi a parte contrantante da primeira parte ou a parte contratante da segunda parte, pero algo non debeu de quedar claro no contrato que o Concello de Carballo fixo con MERCASA para realizar o estudo da reforma do mercado municipal e o novo aparcamento subterráneo.

Se hai uns días a empresa nacional presentaba un estudio no que o aparcamento quedaba excluído e separado do proxecto de reforma do mercado de abastos, agora o tenente de alcalde carballés e concelleiro mellor pagado do goberno (e de tódolos gobernos municipais na historia da comarca), José Antonio Viña, reinterpreta en A Nosa Costa o anterior afirmando que “para nós o proxecto é conxunto, o mercado e o aparcamento. E analizaremos se é mellor separar, desde o punto de vista concesional, ou acometer a actuación conxuntamente”. Ven isto a colación da xuntanza de voceiros municipais, que co gallo deste polémico asunto se celebra hoxe luns.

Non sabemos se foi Groucho Marx o encargado de redactar as condicións do estudo, pero non estaría de máis que desa reunión saíse un concepto ben claro e definitivo do que realmente está a facer MERCASA e do que se pretende facer ou non na praza do Concello. Veremos se ó final a estilográfica non vai ter tinta.

E por certo, que tamén lemos na nosa web veciña que se están a producir sabotaxes e ataques ó portal A Nosa Costa. Dende aquí mandamos todo ó noso apoio ós seus administradores e animámolos a seguir traballando para superar a intolerancia dalgúns exaltados internautas.