Carballo Dixital obtén boa nota no seu propio exame interno

Así é. En CD, no noso esforzado traballo de mellora diaria, contratamos hai uns meses a unha empresa para que examinase o noso funcionamento interno. A elexida, que gañou a súa posición facendo a mellor oferta entre varias competidoras, tiña que avaliar a calidade do noso blog atendendo a diferentes parámetros. A cambio desa avaliación, por suposto, pagaríamoslle unha certa cantidade de cartos.

Pois ben, despois de moito traballo e moito control, revisando todas e cada unha das facetas da nosa redacción e da nosa organización, xa están aquí as conclusións. Por suposto poderíamos gardarlas para nós mesmos e aplicalas niso que os empresarios modernos chaman "mellora continua". Pero como aquí todo é transparencia, preferimos facelas públicas: Carballo Dixital é un dos mellores blogs da internet. Dende logo o mellor da comarca con diferencia, e envidiado polos principais xornalistas de España. O número de redactores é suficiente, a súa formación sobresaliente, e a calidade dos artigos moi destacada. O número de actualizacións considérase o idóneo para o seu ámbito de influencia. O "DAFO" (análise de debilidades, ameazas, fortalezas e oportunidades) destaca especialmente a orixinalidade dos contidos e o emprego do humor como as nosas grandes bazas. Resumindo, que obtemos un notable alto, por non dicir un sobresaínte.

Non obstante, como somos inconformistas e todo esforzo é pequeno para satisfacer á nosa audiencia, imos aplicarnos duramente en mellorar o que xa é un blog "ktkgas".

¿Cómo? ¿Qué isto é autobombo? ¿Que somos nós quen eleximos e pagamos á empresa que fala tan ben de nós? Pois sí, pero o mesmo fai o Concello de Carballo para avaliar a súa xestión deportiva, e nós non iamos ser menos.