Xornada de folga

Mañá mércores, 29 de setembro de 2010, os españois estamos chamados a un folga xeral. Convocada polos sindicatos maioritarios, o paro está motivado como medida de protesta contra as últimas medidas económicas da administración Zapatero, máis concretamente contra a reforma laboral que consideran unha cesión ós desexos dos empresarios e da dereita “neoliberal”.

Polo que atinxe ás nosas comarcas, pouco ou ningún ruido se ten escoitado ós grandes sindicatos nacionais, UGT e CCOO, mentres que no tocante ós partidos políticos, o PP non dixo esta boca é miña (oficialmente non apoia a folga) e o PSOE, coma é lóxico, tampouco. Quen sí saiu á palestra foi o BNG comarcal, da man do seu sindicato amigo a CIG, quenes en rolda de prensa conxunta teñen chamado a facer un seguimento masivo da folga, “útil e necesaria”, así como da manifestación que dende as 12:00 percorrerá as rúas da Coruña. En palabras de Indalecio López, responsable comarcal da CIG: “En Carballo o que vexo son parados e parados. Aquí, sacando un par de empresas, non se crean postos de traballo”. Pola banda do BNG, o seu responsable comarcal Vítor Recarei asegurou que “hai alternativas”, pero que non chegarán pola parte dos dous grandes partidos.

E neste punto hai cousas que a nós non nos cadran. Porque se ben é certo que en Carballo hai parados e parados, máis ca en ningún noutro concello da provincia en porcentaxe, xustamente en Carballo quen goberna é o BNG. O mesmo BNG que presume do progreso económico de Carballo, e que ten borrado o paro do seu discurso político local. O mesmo BNG que, cabe supoñer, debería estar poñendo en marcha esas medidas “alternativas” para, cando menos a escala local, paliar a sangría das colas do INEM. Coma sempre, que fácil é predicar e que difícil dar trigo.

E para rematar unha pregunta: ¿atenderán a folga os concelleiros do BNG con adicación exclusiva, incluido o alcalde? Como cabe supoñer que así será, imaxinamos que este día se lles descontará do soldo.