Bitácora de noticias e opinións sobre a actualidade de Carballo

jueves, mayo 11, 2006

Atrancos


Recibimos unha nota de prensa emitida polo Grupo Parlamentario Popular de Galicia, motivada pola intervención da conselleira de Política Territorial, María Xosé Caride, en resposta a unha pregunta do deputado autonómico do PPdeG Alberto Sueiro.

O grupo popular di que se confirma o retraso da vía de alta capacidade Carballo-Cee, que a consellería evita comprometer prazos e orzamentos, e que a paralización dos trámites “obedece á política revisionista do bipartito, que se traducirá nun retraso mínimo de 2 anos para esa infraestructura”. Os populares encadran os retrasos do corredor a Cee dentro “do castigo que o bipartito está a impoñer á Costa da Morte”, que exemplifican en decisións como “privar a Cee da rede de gas e da Delegación de Facenda, a paralización da piscifactoría prevista por Pescanova en CaboTouriñán, a anulación do centro de repoboación de especies mariñas que se ía construír en Muxía ou a paralización dos trámites encamiñados a dotar a esa mesma localidade dun Parador de Turismo”.

Profundizando no texto, o PP afirma que, ante as preguntas de Sueiro polo retraso da entrada en funcionamento da vía, a conselleira limitouse a censurar a política do anterior executivo, ó que o deputado carballés contestou que “o anterior Executivo galego do PPdeG deixou listos todos os trámites relacionados con esta vía de alta capacidade, de xeito que o novo Goberno xa podería ter licitado o proxecto no pasado mes de setembro, para que a nova infraestrutura entrase en servizo a finais de 2008”.

O único grupo de oposición critica que aínda están por aclarar as datas de inicio e remate das obras, e que, deste xeito, a construcción da VAC non rematará antes do ano 2011. Para rematar recóllense algunhas das palabras da intervención de Sueiro, na que afirmou que “á marea negra do Prestige que afectou á comarca, sucédea agora a Marea Vermella do Goberno bipartito”, ou que “na Costa da Morte estamos fartos das promesas, e os feitos cada día son mais desalentadores. En soio nove meses foron capaces de incumplir todas as ofertas dos seus discursos de oposición de 15 anos”.

Pois dito queda, e a ver se os outros grupos políticos do espectro galego e local se animan a enviarnos tamén os seus comunicados.



0 Comments:

Publicar un comentario en la entrada

Links to this post:

Crear un enlace

<< Home

 
eXTReMe Tracker
Enlace ó noso arquivo RSS Feedburner