¿O Gaiás carballés?

Ó César o que é do César. Se dende este blog temos denunciado repetidamente a xenerosa condescendencia (chamémolo así) da Voz de Galicia co goberno carballés, antonte a columna editorial deste xornal sorprendíanos cun comentario que moitos carballeses viñan realizando nas rúas.

Ó fío da polémica suscitada pola enorme inversión pública no complexo do monte Gaiás de Santiago (a “cidade da Cultura”), chamábase a atención sobre a existencia doutros casos similares a menor escala nas nosas comarcas. En concreto mencionábase que as casas da cultura de Cee e máis de Vimianzo acumulaban fortes inversións económicas en obras ó longo dos anos sen que se vira preto a luz ao final do túnel, e que a Casa dos Oficios de Carballo aínda estaba moito máis atrasada.

En efecto son bastantes os paralelismos entre o grande proxecto do goberno de esquerdas carballés e o complexo do Gaiás: unha grande superficie, grandes edificios destinados a contener uns usos non moi definidos, unha enorme inversión económica precisa para construilo, un financiamento incerto, obras que arrancan e quedan paradas, uns prazos que se alongan e se alongan, e a sensación de que dous anos despois de escomezados os primeiros traballos temos moitos máis por diante ata ver o resultado final completado.

¿Qué pensades vós? ¿Trátase dun proxecto excesivo? ¿Debe replantearse a idea como moitos defenden facer coa Cidade da Cultura? Aí está o debate.