Bitácora de noticias e opinións sobre a actualidade de Carballo

viernes, septiembre 21, 2007

Pop Xiria Pop 2007

Un ano máis ven unha nova edición do festival de rock decano e con máis soleira da nosa comarca: o festival que organiza a sección de balonmán de Xiria, que ten acadado tal grao de asentamento que mesmo se presenta en rolda de prensa no Concello de Carballo por parte das autoridades locais. O alcalde e os concelleiros das ramas relacionadas acompañaron ó principal responsable, Xabier Graña, nunha posta de largo ante os medios na que se valorou especialmente a consolidación do PopXiriaPop, o bo traballo realizado pola organización, e a colaboración de pequenos patrocinadores, ademais de augurar o apoio do Concello “polo menos nesta lexislatura”.

Coma en edicións anteriores a programación está conformada por unha compensada combinación de grupos galegos, nacionais e internacionais. A sesión do venres ten coma prato forte ó grupo irlandés Bap Kenney (actuación única en España), precedido de Portrait (de Vigo) e La Granja (de Mallorca), logo de que finalmente The Runarounds se caeran por problemas personais. Xa o sábado terán protagonismo os grupos madrileños The Right Ons e Tim Soldiers, seguidos de Los Chicos e Mike Miraconda, para rematar o festival coa actuación, tamén única en España, de The Pirates. Se queredes profundizar, tedes máis información na web de Xiria de balonmán (http://www.xiria.net/).

O escenario deste ano voltará a ser a cervexería Dublín, na que se poderán adquirir entradas a prezo de 10 euros para 1 día, ou un bono de 15 € para os dous, con regalo dixital incluído. Noraboa ós organizadores e que sexa un éxito.

0 Comments:

Publicar un comentario en la entrada

Links to this post:

Crear un enlace

<< Home

 
eXTReMe Tracker
Enlace ó noso arquivo RSS Feedburner