Pasaba por aquí…

Lugar: entorno de San Caetano. Hora: media mañá. Por unha beirarrúa achégase o tenente de alcalde de Carballo, José Antonio Viña, e mais un ordenanza municipal. Nun pequeno carriño levan o voluminoso documento que compón o Plan Xeral de Urbanismo. De pronto pola mesma beirarrúa, e por pura casualidade, achégase un fotógrafo e/ou xornalista da Voz de los Ricos e Poderosos:

- Home, José Antonio! E logo que fas por Santiago?

- Hola, pois nada, viña aquí entregar unha copia do PXOM. E ti?

- Pois nada, casualmente pasaba por aquí dando un voltiña, a facer un recado na Xunta. Hai que ver que calor vai hoxe, eh? Parece que vamos para o verán.

- Ai pois sí, este tempo vai tolo.

- Oíches? Xa que estamos aquí podo sacarche unha foto para publicala mañá no xornal, e así xa temos cuberto un espazo, qué che parece?

- Ai, pois non o pensara, pero xa que o dis…

Esta é a conversa que, supoñemos, se debiu de producir onte en Santiago de Compostela, a tenor da fotografía que hoxe publica LVDRP na que se ve a Viña empurrando o carriño para acceder ás dependencias da Xunta. Porque do contrario, se o que pasou foi que Viña convocou ós medios de comunicación para que foran a propósito a Santiago a sacarlle unha foto realizando o que é un acto meramente de trámite, estariamos a falar dun autobombo e un compadreo difícilmente asumible. Así que, case que mellor, quedarémonos coa primeira versión, e suporemos que os xornalistas simplemente “pasaban por alí”.