An de güiner is…

Todo queda en casa. A empresa carballesa Decoraciones J. Bello será a encargada de levar a cabo a disminuida e discutida reforma do mercado municipal de abastos. Así o informa hoxe a prensa local, e abofé que as súas condicións son inmellorables: abarata nun 23% o orzamento inicial, afórralle 500.000 € ó Concello, reduce o prazo de execución a 10 meses, e aínda por riba inclúe unha serie de melloras non previstas no proxecto por valor de 265.000 €. É dicir, que negocio redondo para o consistorio municipal.

Non obstante, este novo e importante paso dado na tramitación da obra non oculta dous debates importantes. Por unha banda as dúbidas de carácter legal que se teñen plantexado neste blog sobre das condicións das concesións e dos postos dos placeiros. E sobre todo pola outra as dúbidas e o rexeitamento que se ten detectado entre moitos carballeses, tanto concesionarios da praza, coma comerciantes do centro ou cidadáns particulares. Polo visto semella que o goberno ten a decisión tomada e vai seguir adiante contra vento e marea, e de feito xa a vindeira semana está previsto que os primeiros placeiros dos postos exteriores comecen a instalarse na planta alta.

Dende o BOE (Boletín Oficial de Evencio, segundo un dos nosos lectores) xa se comeza a preparar o terreo, “es necesario que todos los implicados hagan un esfuerzo para que la inversión sea buena para Carballo”, de modo que todo aquel se atreva a poñer algunha pega xa sabe que vai ser instalado no gueto dos antisistema. Ese mesmo gueto no que se atopaban todos os que hai catro anos dubidaban do anterior gran proxecto para a praza do Concello. Eterno retorno.