Problemas urbanísticos poderían causar o corte de varias rúas

Semella que, logo dun tempo de certa calma, o urbanismo se está a converter outra vez en tema de máxima actualidade no noso Concello.

O pasado día 11, liamos na Voz de Galicia de Carballo, que se volvía a abrir o conflicto con respecto ás rúas abertas na zona do ambulatorio, e o día 12 enterabamonos polo mesmo xornal que o concelleiro de obras e urbanismo Manuel Andrade “instaba” ós propietarios de polígonos a desenvolvelos.

No primeiro dos casos...

...o tema ven de vello. Tan de vello como que o problema xenerouse cando Manuel Andrade era tamén tenente de alcalde, pero nos tempos da CPG, hai máis de 15 anos. Segundo parece, chegárase a un acordo verbal cos propietarios dos terreos da zona do ambulatorio para que cedesen os seus terreos para a apertura de rúas, pero non se firmara ningún convenio por escrito. Pasado o tempo, e para poder construir edificios nesa zona, os propietarios atópanse con que, evidentemente, teñen que desenvolver o correspondente polígono e ceñirse á normas do Plan Xeral, que non se axustan as pactadas de palabra, de modo que lle reclaman ó Concello que se cumpra o acordado verbalmente no seu día. A reclamación ten maior vixencia se temos en conta que o representante do goberno é agora o mesmo que era naquel tempo.

Vista a falta de acordo con Andrade, os propietarios ameazaran xa hai meses cun posible corte das rúas que se abriran no seu día, pero por aquel entón o tema semellou solucionarse temporalmente. Agora volven á carga realizando a mesma ameaza, e aínda non sabemos cómo vai acabar o tema, aínda que dende o punto de vista legal, non semella que os propietarios teñan moitos argumentos na súa man, pois os acordos que non están por escrito non son tales, aínda que se fagan cun todo un concelleiro de urbanismo.

No segundo caso trátase dunha nova realmente sorprendente, xa que Andrade recoñece implícitamente que o desenvolvemento dos polígonos do PXOM de Carballo non é satisfactorio, ó tempo que responsabiliza de iso ós propietarios dos terreos. Sen embargo, ata hai ben pouco tempo, semellaba que a versión oficial sobre este asunto, é que existía un bo avance dos polígonos do Plan, ou, cando menos, así aparecía na prensa local naquelas datas, ó tempo que o propio goberno local semellaba atribuirse o mérito desa circunstancia:

18/1/2004 , 18/1/2004, 18/1/2004, 5/1/2004, 9/1/2005

Estas dúas novas saen á luz mentres se dan debates en torno á proxectos coma o campo de golf, e mentres se está a levar a cabo a revisión do Plan Xeral, promovida polo actual goberno puco despois de chegar ó poder e pouco despois de terse aprobado o plan vixente.