Ideas-forza

O BNG de Carballo ven de facer balance dos seus tres anos á fronte do goberno local, nun acto que cabe entender coma o pistoletazo de saída de cara ás próximas eleccións municipais, xa que é o primeiro destas características que realiza no mandato.

Tal e como recollía onte a prensa local, Evencio Ferrero considerou que o seu grupo cumprira coa maior parte das súas promesas, tendo en conta o “plano estratéxico” co que se presentou no ano 2003, e mesmo nas “actuais circunstancias”, como se pode leer na pantalla da fotografía.

Ferrero falou do afianzamento de Carballo como cabeceira de comarca, e centro das infraestructuras, con exemplos como a “estrada de Carballo a Ordes, a de Caión, ou a de Buño”, así como a circunvalación, que xa está en proxecto.

Pero o máis destacable da intervención do alcalde carballés foi o acuñamento dun novo término político: as “ideas-forza”. Nesta categoría incluiu a Casa dos Oficios, o proxecto no litoral de Razo-Baldaio, a Vila de Negreira, o compromiso “histórico” do carril-bici a Razo, ou o proxecto de “humanización” do centro urbano (para entendernos, o famoso parking-centro comercial).

No mesmo acto, o BNG reiterou a súa “intención” de retirar a peaxe da A-55 e de acadar o hospital comarcal. Para rematar, Evencio destacou os resultados de Carballo Limpo, porque “non todo van ser obras”.

Invitamos ós nosos lectores a que analicen nos seus comentarios cales destes logros son obra do goberno tripartito, cales doutras administracións e partidos, cantos son realidades e cantos son promesas aínda por cumprir.

Qué mágoa que Ferrero non poidera falar de "feitos-forza".