Horta de Romay

Unha das noticias da últimas datas é a inminente urbanizacion da chamada Horta de Romay. Para os despistados, o espazo que hai entre a Praza do Concello e a Igrexa por detrás do Mexillón. Trátase do resultado dun convenio que o Concello asinara cos propietarios deses terreos xa na anterior lexislatura, e segundo puidemos saber inclúe a creación dunha rúa peatonal, unha praza porticada e a construcción de edificios.

O caso é que o asunto supón unha noticia triple. Por unha parte, pola obra en si, que significa a construcción de novas vivendas e a apertura dunha nova vía peatonal. Por outra parte porque a superficie, en tanto non escomecen as obras, vaise adicar a aparcamento provisional, tal e como anunciaban o domingo o alcalde Evencio Ferrero e o concelleiro de Facenda José Antonio Viña. E en último término porque para proceder ás obras procedeuse a destruir o marabilloso xardín (privado) con árbores case centenarias que medraba en pleno centro carballés.

Este último aspecto ten sido moi criticado por algúns medios, que non entenden que se teña destruido un espazo desta importancia ante a pasividade das administracións, sen que ninguén diga nada, ou que non se puidesen ter aproveitado as árbores existentes para a nova praza. Pero o máis noticiable do asunto é que as críticas máis duras proveñen do grupo Voz, que mesmo ten atacado de xeito contundente ó goberno local. ¿Estará a cambiar algo?

P.D.: Non, despois de escoitar hoxe Radiovoz, non está a cambiar nada. Xa se encargou o locutor de deixar ben clariño que, máis ou menos, "esto é cousa de Varela" (como todos os males que nos aqueixan). Sempre hai quen lle saque as castañas do lume ó noso primeiro prócer.