Queremos saber

Tanto agardar e tanto empeño para abrir a oferta do parking-centro comercial, e ó final resulta que só uns poucos elexidos poden saber en qué consiste. Hoxe a prensa local informa amplamente sobre as reaccións dos distintos grupos políticos (información superflua que non engade nada novo sobre o xa coñecido por todos), pero conta moi pouca cousa sobre os pormenores da oferta.

O único salientable é que semella que, como tamén era de esperar, a oferta aproveita ó máximo a marxe que lle deixaba o prego de condicións: se o número de prazas mínimas era de 500, hai 516 prazas; se o espazo máximo a ocupar eran 5400 metros cadrados, ocúpanse 5400 metros cadrados; se a aportación máxima do Concello (esto é, cartos públicos) eran 1.400.000 euros, a aportación serán 1.400.000 euros, e así sucesivamente. De modo que parece que se confirman as prediccións anunciadas pola oposición municipal. Por outra banda, o presuposto final será duns 13 millóns, cando ata o de agora falárase duns 9 millóns.

Pero o que nos parece máis grave (e non só a nós, porque o PP e os comerciantes tamén o teñen denunciado) é que non se dean a coñecer máis datos nin se permita difundir en qué consiste o proxecto. Segundo o goberno “para que non circule por aí”. ¿Ónde é “por aí”, polos medios de comunicación? ¿E qué ten de malo saber? Esperamos que se rectifique. Todos queremos saber.