A proba do algodón

Xa van varios debates entre os 5 candidatos que aspiran a ocupar a alcaldía de Carballo. Os primeiros encontros tiveron como escenario os micrófonos de RadioVoz, e máis recentemente celebrouse un novo acto dentro da Semana da Familia, no que os líderes políticos expuxeron as súas propostas e os seus programas en materia de familia e políticas sociais. Os principais aspectos deste último debate veñen recollidos hoxe na prensa local baixo a perspectiva da Voz de Galicia, a quen por certo lle resulta extrano que se fixeran críticas ó goberno actual.

A novidade é que nesta cita electoral de 2007 está a operar en Carballo unha televisión local (BERTV, no canal 31) que ven retransmitindo moitos destes eventos. Dende CD queremos felicitar e saudar moi positivamente esta iniciativa, porque nos permite coñecer de primeira man cómo son en realidade os nosos candidatos. Sen conservantes de fotografías retocadas, edulcorantes de preguntas preparadas, nin tertulias repletas de estabilizantes. Cada candidato fala libremente, os asistentes preguntan o que queren, e os cidadáns podemos comprobar a capacidade e a preparación de quen nos pide o voto. É dicir, unha sorte de proba do algodón.

Por iso imos excusar facer valoracións de líderes, e preferimos invitar a tódolos carballeses a seguir con atención estas intervencións e sacar as súas propias conclusións. Non obstante, non podemos evitar a reflexión de que, visto o visto, hai candidatos ós que cada intervención pública non “edulcorada” lles fai perder votos, e outros que estarán desexando unha nova convocatoria para demostrar a súa superioridade.