A Festa da Mala

Sorprendente, e tememos que non para ben, programación a das festas do San Xoán 2007. No día de onte coñeciamos polo miudo os pormenores dos actos e festividades que a comisión de festas preparou para este ano, e lamentamos non poder anunciar novas especialmente destacables.

Atrás quedan anos nos que poidemos escoitar en Carballo a Amaral, OBK, Sergio Dalma, La Unión, Duncan Dhu, Chenoa, David Bisbal ou Luz Casal, entre outros. A actuación estelar deste 2007 será unha cantante, supoñemos que moi coñecida na súa vila polos seus amigos, que responde ó nome de “Mala Rodríguez” (non é coña). Polo demais, a comisión destaca a actuación doutro grupo de rock chamado “Los Strait Jackets” (disque competidores directos dos Rolling Stones), e os xa tradicionais concursos de carrilanas, cachelas ou descenso do Anllóns.

Non sabemos se, como ben se apuntaba nalgún medio, o proceso electoral restou tempo para a confección do programa. Pero en todo caso o que queda claro é que estas festas do San Xoán están bastante lonxe do que unha pequena cidade coma Carballo merece, e que seguramente pasarán á historia coma as festas “da Mala”.