O BNG gobernará en Carballo

Resultados sorprendentes nas eleccións municipais celebradas onte en Carballo. Contra os seus mellores pronósticos, o Bloque Nacionalista convértese na forza máis votada con diferencia, acadando 9 concelleiros, mentres que o PSOE sube 1 para chegar a 3, cousa que entraba dentro do agardado. Deste xeito, Carballo terá a bo seguro un goberno de coalición nacionalista-socialista con Evencio Ferrero como alcalde.

En tanto, os partidos de centro-dereita experimentaron un acusado descenso. O PP queda en 6 concelleiros e Terra Galega, trala súa espectacular e dilapidadora campaña, baixa a 3. Semella que finalmente a aventura de Manuel Andrade & Co. unicamente vai deixar coma herdanza na nosa cidade o famoso túnel e un goberno en bandexa para a esquerda. Probablemente non era esa a idea dos seus promotores.

Como segundas lecturas hai que subliñar que a división de voto entre populares e “centristas” provocou que os nacionalistas acadasen a victoria incluso na zona rural, e que contra a crenza comunmente establecida, a baixa participación que se rexistrou non favoreceu á dereita, senón á esquerda.

Agora a pregunta que moitos se fan é: ¿vai Manuel Andrade seguir á fronte do seu partido na oposición? Nós aventurámosnos a dudalo moito.


Nota: O resultado da quiniela que organizamos foi o seguinte:

PP: 8
BNG: 6
TG: 4
PSOE: 3

(Como vedes, non estivestes moi acertados)