Finalizan as festas do San Xoán

As festas do San Xoán 2007 veñen de rematar. Unhas festas caracterizadas polo mal tempo e polo sorprendente cartel de actuacións elexido. A “Mala Rodríguez” e os distintos grupo de rock que actuaron na zona dos Baños Vellos convenceron á minoría de seguidores máis fieis, pero decepcionaron á meirande parte do público, que non dubidou en expresar o seu malestar por un programa confeccionado por uns poucos e para uns poucos, e que polo tanto só tivo como espectadores a eses poucos (crónica dunha perogrullada anunciada).

Por iso, como era de agardar, os actos que si tiveron éxito foron os de toda a vida: o descenso do Anllóns, o concurso de cachelas, a carreira de carrilanas, e a festa do Bosque, ademais das imprescindibles verbenas. Toda unha mensaxe, para quen a queira escoitar, das cousas que os carballeses gustamos desfrutar, e de que os experimentos, sobre todo cando se fan cos cartos de todos, mellor na casa e con gaseosa.

Mais para que non se diga que nós non estamos na onda, e atendendo á nosa promesa de poñernos ao día no tema do rap, vimos de localizar a outro artista que reúne tódolos requisitos. Se o que se trata é de innovar, ser atrevidos, iconoclastas e alternativos, atrevémonos a propoñer que para o próximo San Xoán se contrate a este paiaso que está arrasar no Youtube. ¿Non sería un puntazo, nenos?