O perigo está soplando no vento

Hai un ano traiamos ó noso blog unha noticia saída das páxinas do Boletín Oficial da Provincia. Unha empresa enerxética chamada Galenova pretendía colocar un parque eólico en Pedrarrubia, con 12 aeroxeneradores na parroquia de Vilela e 1 na parroquia larachesa de Lemaio. Naquel momento o anuncio bastou para disparar tódolas alarmas e provocar unha unánime oposición, tanto por parte de tódolos partidos políticos como por parte dos veciños e asociacións ecoloxistas.

Pensabamos que este bloque anti-parque eólico tiña provocado a paralización do proxecto, porque dende o mes de marzo de 2007 ata agora non tiñamos oído novidade algunha ó respecto. Ata agora. Porque a semana pasada enterámonos de que, no medio do silencio mediático de todo este tempo, os trámites da solicitude de Galenova continuaron e de que a consellería de Medio Ambiente (PSOE) ven de dar o seu visto bo, con algunas condicións, duns muiños de vento que serán visibles dende a marisma de Baldaio. Partindo de que non somos expertos na materia, e polo que podemos entresacar da moitas veces confusa información aparecida nos medios, as cousas non están decididas, pero o parque eólico ten superado o primeiro obstáculo e está máis preto de ser realidade. De feito, a empresa está a iniciar contactos cos veciños para acadar a venta dos terreos.

De modo que a ameaza se ten convertido en perigo. Dende o Concello, Evencio Ferrero considera que a negativa dos afectados a vender os seus terreos bastará para abortar o proxecto, pero estes non as teñen todas consigo e a posibilidade expropiación asoma no horizonte. Outro factor importante a considerar é que a consellería de Industria (BNG) tamén terá tela que cortar no asunto. Haberá que seguir de preto esta polémica, porque a resposta, máis que nunca, está soplando no vento.