21% de éxito

Que non se diga que non somos xustos. Dende CD criticamos a aventurada viaxe a Bruxelas de Evencio Ferrero e sobre todo a falta de información das xestións realizadas. Pensabamos nós que esta clase de lides tiñan máis de publicitarias que de realistas, e dubidábamos de que a xesta europea servise de moito á hora de acadar as subvencións que o alcalde carballés solicitaba para a nosa vila.

Mais onte decatámonos na prensa local que a UE ven de conceder a Carballo unha axunda de 3,2 millóns de euros, que servirá para rematar dunha vez por todas a faraónica e escorialesca obra da Casa dos Oficios. Unha boa noticia que, como non podía ser doutro xeito, acollemos do xeito positivo que se merece.

Con todo, no noso afán por mirar “detrás das vallas” e compensar o bombo e platillo dos xornalistas amigos do BNG carballés, non podemos evitar recordar certos datos que os medios afíns esquecen incluir no relato dos feitos. Coma é o caso de que, contrariamente á sensación que da a noticia, o éxito non é total nin maioritario. Porque a cantidade que Ferrero foi defender á capital europea era de nada menos que 22 millóns de euros, e incluía a financiación do proxecto Temunde para converter o barrio da Milagrosa nun “parque temático” das enerxías renovables. Tendo que en conta que neses 22 millóns ían incluidos 1,4 que o Concello tería que poñer do seu bolsillo (extraña subvención, polo tanto), o éxito europeo acadado ata o de agora anda polo 21%, sen saber se a visita ó extranxeiro pesou moito ou pouco na decisión.

De modo que agardamos a que o organismo europeo se pronuncie acerca da subvención sobre do segundo proxecto para saber ata onde nos podemos sentir de todo felices, ou en parte frustrados. Sexa como fora, agora a pelota está no tellado do goberno local, que por fin despois de anos de retraso dispón dos fondos necesarios para a Casa dos Oficios e terá agora que demostrar a súa capacidade de xestión para rematar e poñer a funcionar a obra de xeito satisfactorio. Tamén haberá quen opine que todos estes cartos deberían gastarse noutros problemas máis urxentes, coma as garderías, os aparcamentos, ou mesmo o mercado municipal, pero evidentemente ese sería outro debate.