Outro ladrillo no muro

Espectacular capítulo na longa lista de campañas publicitarias que o xornal amigo-prolongación do goberno local ten por hábito publicar. Coincidindo casualmente cunha iniciativa na que o PP reclama a realización dun estudo por unha empresa externa das necesidades de aparcamento en Carballo, LVDGE facía onte unha ampla reportaxe con plano incluido no que destacaba que a nosa cidade conta nada menos que con 1.000 prazas en parkings provisionais.

Na reportaxe, además de obviar a perda dos aparcamentos da vella estación de autobuses, incluense zonas que aínda non están habilitadas e “previsións” de hipotéticos acordos futuros, ou xustificacións para a ausencia de estacionamentos en edificios novos coma a Casa dos Oficios, ó parecer inviables por tratarse dun “barreiro”. Con todo, a meirande parte do aparcamentos contabilizados e o único espazo realmente definitivo (o Haley), veñen de bastante antigo, pero calquera diría a tenor da información dos críticos xornalistas locais, que os carballeses somos uns mixiricas e que nos queixamos de vicio cando dicimos que non atopamos onde estacionar os nosos vehículos. En Carballo sobra onde aparcar.

De modo que xa ven que, pese a que a realidade tras das vallas vai sendo cada días máis patente, sempre hai quen intenta levantar e subir máis o muro que soporta os grandes paneis publicitarios. Mais non se ofusquen. Despois de todo, este capítulo só é outro ladrillo no muro.