Bitácora de noticias e opinións sobre a actualidade de Carballo

sábado, septiembre 13, 2008

Un mundo perfecto... pero non


Moito se esforzan os medios xenerosos cos gobernantes en presentarnos un mundo perfecto polo que nós, humildes súbditos, deberiamos estar eternamente agradecidos. Todos os anos o comezo do curso escolar se caracterizaba por vir cargado de problemas de xestións e de axustes, mais sorprendentemente parecía que neste 2008 as cousas estaban no seu sitio. Logo dun curso pasado cheo de polémicas e absolutos desastres da Consellería de Educación e outras administracións (escasas ou nulas as solucións dende o Concello), semellaba que todo quedara solucionado... pero non.

Primeiro foi o noso benquerido goberno local o que adicou os seus esforzos en presentarnos o éxito do programa Concilia. E a pesar de resaltar que ese programa estaba a disposición de todo o mundo, resulta que só se ofrece en 3 centros e que hay menos de 100 alumnos beneficiados (ou estaba mal a información ofrecida na prensa ou algo non cadra).

Por outra banda enterámosnos de que no San Luis Romero a colocación das paradas de bus é tan caótica que a 35 familias lles resulta máis fácil levar eles ós seus fillos ó colexio. O cabreo, evidentemente, é importante. Hoxe na Cristina a dirección do centro ven de presentar a súa demisión polo incumprimento da Delegación de Educación en cubrir as prazas de profesores. Ademais, no colexio Fogar hai polémica sobre a aprobación da xornada continua. E cabe tamén destacar que xa hai uns meses se confirmara o adeus á gardería da zona do colexio Bergantiños por un problema de xestión, debidamente tapado e camuflado polo goberno-prensa de Carballo cos avances para a outra gardería que xa estaba prevista hai tempo na parcela da urbanización de Riotor1o (1 gardería igual que 2?). Tanto nun caso coma no outro, o bipartito carballés acumula xa 5 anos plagados de anuncios e sen unha soa nova praza de gardería.

Tanto é o caos que mesmo o PP ven de espertar do seu letargo (coma?) estival para denunciar a falta de prazas en escolas infantís para nenos de 0 a 3 anos, e falta de comedor na maioría dos colexios, ó contrario do prometido pola Xunta. Retoman os populares a polémica no Bergantiños, para o que Ferrero anunciara a necesidade de construir un novo centro, e que finalmente quedou na promesa dunha suposta ampliación sen datas nin cartos. Certamente, a nota de prensa da oposición non foi sen tempo, porque este mundo nin é perfecto, nin se achegou aínda a un par de anos luz de selo.



 
eXTReMe Tracker
Enlace ó noso arquivo RSS Feedburner