Detrás das vallas: a nosa economía non tira

Outro ano máis chega ás nosas mans o Atlas Económico de Caixanova, o correspondente ó ano 2009 que pronto ha rematar. Un documento que recolle os principais indicadores económicos de todos os concellos de Galicia e que nos permite coñecer a posición e a evolución de Carballo dende diversos puntos de vista.

E un ano máis hai unha circunstancia que multiplica a nosa curiosidade: o feito de que, contrariamente ó habitual, nin o goberno local nin a súa prensa oficial teña adicado tempo algún a destacar o “grande crecemento” nin a “transformación” de Carballo. Imos partir da nosa análise do ano 2008, e comparar apartado por apartado:

Renta dispoñible: ocupamos un discreto posto número 49 en renta por habitante de entre os 94 concellos da provincia, moi por debaixo da nosa posición en canto a poboación.

Poboación: contamos con 30.653 habitantes, superados só polas 3 cidades da provincia, Narón e Oleiros. Séguennos de cerca Arteixo e Culleredo.

PIB: con 18.672 euros habitante, temos a 16 concellos por diante na provincia.

Emprego: un ano máis somos o segundo concello coa taxa de paro máis alta de toda a provincia, cun alarmante 11,6 %, só superado polo 12,6 de Camariñas. O ano pasado era do 9,1 %. É dicir, un aumento nada menos que de 2,5 puntos nun ano.

Índice de poboación: 110, vindo dunha evolución 107-107-108-109.

Índice de actividade comercial: 108, vindo dunha evolución 103-99-100-105.

Índice de actividade industrial: 62, vindo dunha evolución 84-81-85-66.

Índice de actividade turística: 74, vindo dunha evolución 87-77-71-69.

Índice de restauración e bares: 112, aquí non temos datos da evolución, pero está claro que somos unha potencia.

Índice de actividade económica: 77, repetimos o indicador global do ano pasado, logo de caer en anos anteriores 93-92-92-77.

En resumo, máis do mesmo con signos alarmantes de estancamento ou retroceso, se o miramos con perspectiva. Crecemos en poboación pero, ó contrario do que sucede en concellos do noso tamaño, iso non se reflicte para nada na actividade económica. O comercio recupérase timidamente, o turismo parece que esperta pero segue moi baixo, e a industria continúa en caída libre dentro dun conxunto que se estanca e non levanta cabeza logo de anos de caída. E por suposto, por riba de todo está o drama do paro. Pero non esperen que os gobernantes nos falen disto. Tamén está detrás das vallas.