Biblioteca sorpresa

Hoxe na prensa local (ó paso que vamos se cadra máis axeitado sería falar do departamento de prensa do BNG) descubrimos con sorpresa que o goberno central ven de adxudicar 1,5 millóns de euros nos ornamentos do 2010 para facer unha obra en Carballo. ¿De qué obra se tratará? ¿Será a ampliación do mercado? ¿O tan desexado aparcamento subterráneo? ¿Aquel parque do Bosque do que xa ninguén se acorda? Non, se cadra será o hospital comarcal. ¿Ou o proxecto Temunde? ¿Ou rematarase por fin o sempiterno carril-bici? Se cadra tamén pode ser que tras 6 anos de promesas poidamos ter unha nova gardería pública. ¿Ou aportaranse cartos á circunvalación? Non, xa está, han ser cartos para o porto deportivo. Bueno, ou para o campo de golf, ou… A lista de proxectos inclusos e incomezados de Carballo é tan longa que podería ser para calquera de todas estas cousas das que tanto se ten falado e pouco ou nada se ten feito. Mais resulta que non. Imos botar unha ollada á nosa hemeroteca. Fai algo máis de ano e medio escribiamos así en CD:

“Nunha entrevista concedida a RadioVoz Bergantiños co gallo do día do libro, o escritor e historiador carballés Xan Fraga lanzaba una reivindicación en positivo, a de construir unha grande biblioteca en Carballo. […].

Sen embargo e tristemente, esta idea non ten sido recollida pola prensa local nin polos grupos políticos nin do goberno nin da oposición, e córrese o risco de que caia no esquecemento.[…]”

En efecto, trátase dunha aportación económica para facer unha nova biblioteca comarcal en Carballo, que amplíe e mellore o servizo do local actual, superado nas súas dimensións. O BNG de Bergantiños insiste en que se trata dun éxito dos seus deputados na carreira de San Jerónimo, mentres La Voz de los Ricos y Poderosos destaca que se trata de cumprir unha promesa electoral de case todos os grupos. E dende logo nós non imos botarlle auga ó viño do entusiasmo, cando precisamente fomos os únicos que no seu día destacamos e apoiamos a iniciativa de Xan Fraga. Era hora de ter noticias coma esta no medio da mediocridade xeral.

Pero precisamente por iso hai algo que non cadra en toda esta historia e que nos inquieta: que nunha vila onde os proxectos se anuncian a bombo e platillo (e con redobres de tambor) e danse por feitos ós 5 minutos de ocorrérselle a alguén, dun día para outro aparezan 1,5 millóns de euros saídos da nada para un proxecto do que, por moito que nos conten, ninguén dixera nin media palabra e, sexamos sinceros, non existía unha gran demanda na cidadanía, ou cando menos non maior que para outros problemas. E sobre todo nos inquieta cando nos enteramos de que o Concello nin sequera sabe onde construir o edificio, e por suposto non haberá proxecto nin se estará en trámites de contratalo. Máis ben da a sensación de que se trataba de primeiro conseguir cartos, e despois atopar un fin ó que destinalos. É dicir, unha vez máis improvisación antes que planificación. Oxalá sexamos mal pensados de máis, e que despois de tantos engaños, o noso goberno teña aprendido a traballar con discreción e previsión en proxectos reais e sólidos.