Humilde… ¿ou non?

Falárannos dunha comisión especial, pero o certo é que este luns xa coñecemos as porcentaxes en que os concelleiros do goberno local de Carballo (obrigados polas circunstancias) van reducir os seus soldos. Un 7% verá reducido o seu salario José Antonio Viña, un 6% os demais concelleiros con adicación exclusiva (incluindo o alcalde), e un 5% os concelleiros con adicación parcial. Este sería o resultado máis salientable co movido pleno celebrado onte en Carballo. E dicimos movido porque os ánimos entre Evencio Ferrero e o Partido Popular acadaron temperaturas elevadas e descoñecidas ata o de agora, evidenciando que nos queda por diante un ano ata os vindeiros comicios e as espadas están en todo o alto.

O centro da polémica estriba nos argumentos empregados por Ferrero para xustificar a súa rebaixa, que segundo manifestou sigue os criterios marcados pola Fegamp. Para reforzar o seu argumento o nacionalista gabouse unha vez máis de cobrar o mesmo que coma mestre, e fixo referencia a alcaldes populares doutros concellos de Galicia. Sen embargo, os populares non desperdiciaron a ocasión de lembrarlle que o goberno, unilateralmente, decidira hai uns meses rebaixarlles as retribucións ós concelleiros da oposición un 10%. Ferrero decidiu entón pasar da defensa ao ataque sacando a relucir o salario de Alberto Sueiro como deputado autonómico e presumindo de ter a súa declaración colgada da páxina web do concello. Esto fixo saltar ó concelleiro popular Juan Carlos Castro que acusou ó alcalde de facer “demagoxia” e de ser un “provocador nato”, e preguntou airadamente polas dietas que Evencio cobra coma membro do consello de Xestur, as cales, segundo afirmou, non figuraban na última declaración publicada. A Nosa Costa Radio recolle o audio do momento.

Emocións e palabras aparte, o certo é que Evencio Ferrero perdeu onte unha vez máis unha oportunidade de ouro para quedar coma o home humilde que tanto presume de ser. Porque despois de terlle baixado o soldo á oposición un 10%, cando os deputados, tanto nacionais coma autonómicos, están a baixarse un 15%, e tendo coma ten o goberno con maior gasto en adicacións exclusivas, e con máis paro da provincia… despois de todo isto, agarrarse a unhas recomendacións para quedarse nun 6% resulta ridículo, e non amosa para nada a suposta humildade dun home que fixo do desinterese económico unha bandeira electoral. ¿Tan difícil tería sido rebaixar un 10 ou un 15% os soldos do goberno, e con iso tapar bocas e demostrar a súa humildade? ¿Por qué non se fixo? E, xa de paso, tamén tería sido fácil amosar as dietas que o alcalde cobra coma membro do consello de administración de Xestur, ou doutros organismos, ¿ou non?