Veteranos de guerra

Hoxe podemos ler na Voz de Galicia unha desas historias da mili (ou da “puta mili” que diría o sargento Arensibia creado por Ivá e “nasío pa matá”), coa que moitos veteranos lembran as anécdotas máis divertidas dos seus anos de servicio militar.

Ramiro Calvelo Recarey, o número 8 da candidatura de Terra Galega en Carballo participa hoxe nunha boa idea da Voz de Galicia de Carballo, unha serie de artigos onde os compoñentes das distintas listas electorais se presentan a si mesmos ós cidadáns, e fan proselitismo do seu partido. Entre outros aspectos, o entrevistado fai notar que coñece a Manuel Andrade dende 1979 e que foi alcalde de barrio con el durante 12 anos, ata o 1991. Tamén destaca do seu sarxento naquelas e nestas fazañas bélicas, que “Andrade é un home con decisión, que chama ás cousas polo seu nome, como ten que ser. Nestes catro anos demostrou como se goberna un concello e seguirá demostrándoo”.

Porque os veteranos das guerras carballesas da transición foron chamados de novo a filas hai 4 anos polo seu sarxento, e ademais pretenden prolongar os seus servizos durante 4 anos máis, coma soldados que se resisten a aceptar que hai anos que se firmou a paz.