¿Desapareceu a oposición en Carballo?

Hai uns meses publicaramos un artigo titulado “¿Hai oposición en Carballo?” no que poñíamos na picota a case que nula iniciativa do PP carballés facendo a imprescindible oposición nun concello democrático. Sobre todo nun Concello coma Carballo, cun goberno de tres que cremos que está moi lonxe de ser modélico.

Por sorte para algúns e desgraza para outros, a partir do mes de decembro reapareceu a oposición, e non había semana na que os populares non denunciasen os temas que a moitas nos preocupaban, estivesemos de acordo ou non, con notas de prensa e roldas de prensa case diarias.

Pero tan repentinamente coma espertaron, semella que agora caeron durmidos. Nas últimas semanas as iniciativas tanto do PP coma dos seus cachorros de Novas Xeracións cóntanse cos dedos dunha man, e xusto cando nos achegamos á conta atrás do último ano da lexislatura, onde máis deberían moverse.

¿Terá que ver esto precisamente coa preparación das eleccións? ¿Contaxiaríanse os populares do sector “brando” (Gallardón, Arriola, etc) que recomenda “perfil baixo” e non facer ruido, e que parece tomar cada vez máis forza no partido? ¿Ou será que quedaron cansos de tanto traballar?

Á espera de coñecer unha explicación, preferiríamos ter unha oposición que non fose coma o Guadiana.