Enerxías alternativas

Unha iniciativa moi interesante a que durante os últimos tempos está a desenvolver Axober. Mañá será inaugurada a segunda edición das Xornadas de Enerxías Renovables e Aforro Enerxético. Será ás 5 da tarde no Pazo da Cultura, coa asistencia do conselleiro de Innovación e Industria, Fernando Blanco, e por suposto do alcalde de Carballo.

Dentro das actividades, e ademais de diferentes charlas, ofreceranse 2 exposicións, “A través das enerxías” (na segunda planta do Pazo) e “Enerxías Renovables” (nunha carpa exterior), que mostrara os productos de 15 empresas do sector entre as que se atopan algunhas da nosa vila. As charlas do primeiro día correrán a cargo de Manuel Caride González (enxeñeiro técnico industrial da Dirección Xeral de Industria), que falará sobre o marco lexislativo das enerxías renovables, e Nicolás Vázquez Iglesias (físico e enxeñeiro industrial do Inega), que o fará sobre a situación actual e das perspectivas do sector en Galicia.

As xornadas durarán 4 días e contarán coa asistencia confirmada de 250 persoas, pero os interesados aínda están a tempo de solicitalo ata mañá pola mañá. Noraboa a Axober, e oxalá que de aquí poidan saír boas ideas para aforrar enerxía, protexer o medio ambiente, e para que as empresas de Carballo poidan competir mellor e participar deste novo mercado. Con ideas coma esta é como se fomenta o progreso.

(P.D.: admítense apostas sobre quén vai capitalizar as fotografías do xornal do día seguinte)