Nunca Máis 2006?

Como xa sabedes Carballo Dixital é un blog circunscrito á actualidade do noso concello. E, toquemos madeira (nunca mellor dito), Carballo é unha das poucas localidades que ata o de agora se ten librado da tremenda oleada de lumes que está a asolar Galicia. Sen embargo, o feito de que un lector nos fixese chegar amablemente a imaxe coa que ilustramos este post animounos a deixar algúns comentarios que ben poderían alentar un debate interesante.

Polo que sabemos, non é que Nunca Máis estea a coller novos folgos. É ben certo que hai dous anos (no último verán do goberno Fraga previo ás eleccións) houbo persoeiros do mundo da cultura que falaron de crear un Nunca Máis contra o lume, mais a idea non chegou a cristalizar. A foto que vedes é unha simple montaxe, supoñemos que dirixida a chamar á reflexión sobre os paralelismos entre esta catástrofe e a do Prestige, e sobre as reaccións e comportamentos dos diversos sectores sociais galegos.

Aínda que as comparacións son odiosas, o certo é que a vaga de lumes forestais que estamos a sufrir constitúe un desastre aínda maior có do pretroleiro, pois ademais dos danos ecolóxicos evidentes, tense cobrado xa a vida de 3 persoas, e ameaza as vivendas e pertenencias de centos delas, ademais de cortar estradas e alterar a vida diaria de moitas máis. Por iso chama a atención que a reacción da xente do chamado “mundo da cultura” e da maioría das medios de comunicación teña sido tan tibia e tan “políticamente correcta” coma din agora, se a comparamos co seu antecedente. Lonxe queda o recordo de Manuel Rivas, Xurxo Souto ou Carlos Blanco esixindo demisións ante as masas enardecidas, en pleno inicio da marea negra. Desta volta, tan só uns pouquiños actores teñen comparecido nun pequena rolda de prensa para mostrar a súa preocupación e solidaridade. E pese a que sabemos que os medios, a coordinación e a selección de persoal non teñen sido precisamente exemplares, os mesmos medios que se postularon entón na defensa dos cidadáns contra a “incompetencia” do poder, agora chamannos a todos á colaboración.

Partindo da base de que todos debemos afrontar xustos esta catástrofe, e de que xa haberá tempo para analizar o ocorrido, nós pensamos que hai algo neste país que non funciona ben cando, ante desastres similares, as reaccións son tan opostas segundo gobernen uns ou outros. Antes, agora e sempre: nunca máis lumes en Galicia.