¡Se callen, coño!

“Berro Seco” de LVDGE do sábado 23-06-08:

“Si la gestión es correcta, la oposición debe callarse”.

E punto. Xa avisaramos que o asunto do que máis se está falar nos bares e nas rúas de Carballo estes días non é curiosamente das festas do San Xoán. E todo porque moitos carballeses recibiron e siguen recibindo nestas datas unhas saborosas cartas remitidas polo Concello de Carballo nas que se comunica que deben pagar uns recibos do imposto de bens inmobles (IBI) que nalgúns casos acadan os 600 €. Sí, leron ben. Seiscentos euros, ou que é o mesmo, cen mil pesetas.

En teoría estas desorbitadas cifras corresponden co incremento de valor que experimentaron as vivendas de moitos cidadáns co gallo de distintas reformas realizadas nas mesmas, e ademais incluindo os atrasos de anos anteriores que non lles foran comunicados no seu día. O grave do asunto é que, en palabras dos afectados, a maioría dos casos non corresponden a ampliacións nin a grandes reformas, senón a traballos coma arranxos de tellados e pequenas obras que case cabería calificar coma de mantemento. A lebre saltou por unha denuncia do PP, que ademais advirte de que o procedemento non é correcto, que as liquidacións son nulas porque non lles foron notificadas no seu momento, e que os afectados poden recorrer e conseguir que a factura quede sen efecto.

Non estamos a falar dunha simple pataleta de quen ve como se lle aumentan os impostos, senón dun verdadeiro problema social de primerísima orde. Hai moitas familias compostas por persoas xubiladas ou en paro que non son capaces nun só mes de facer fronte a semellante navallazo, e ás que só o pago a prazos poderá paliar en parte un terrible golpe que chega xusto en plena crise económica.

Pero o que a nós máis nos ten cabreado, e non temos por costume empregar estas verbas, é o xeito en que o binomio goberno-medios afíns -tanto monta monta tanto- ten enfocado o asunto. En primeiro lugar, segundo os Evencio boys and girls, o Concello non ten nada que ver con este imposto. Tanto é así, que o logotipo que poden vostedes ver nas notificacións non é o do Concello de Carballo, senón un espexismo provocado polo bochorno destes días. E en segundo lugar, o goberno ten entablado un debate coa oposición acerca dos pormenores máis ou menos legais do procedemento que leva á sempre crítica Voz Defensora de la Gestión Excelente a concluir que “si la gestión es correcta, la oposición debe callarse”. Cun par. Este tema non gusta, é desagradable, mellor que non se saiba. Non vaia ser que alguén se enfade coa xestion excelente.

De maneira que unha suba de impostos extemporánea e espectacular que pon contra as cordas a moitos de nós redúcese a unha simple polémica xurídica, e que a oposición non ten dereito nin sequera a falar do asunto. Tendo en conta que os cidadáns non temos espazo nin voz no salón de plenos, ¿qué se supón que temos que facer nós? ¿Darlle as grazas ó alcalde por non cobrarnos 1000 €? E sobre todo, ¿qué máis nos ten a nós que o cobro sexa legal, se supón un atraco a man armada ás nosas economías familiares?

Por sorte, hoxe existen espazos coma este blog. Dende aquí invitamos a todos os afectados a enviarnos e explicarnos o seu caso. Miren por onde, a nós non nos gusta calar.