Primeira amonestación

A que toca amosarlle a Feijoo e ó conselleiro de política territorial Agustín Hernández. Comprometéranse os dous mandatarios xunteiros a que antes de rematar este verán estarían comezadas as obras da autovía Carballo-Berdoias. Pero o verán rematou e as obras están sen comezar. É máis, o propio conselleiro ven de confirmar que se vai sacar de novo a concurso (por terceira vez) a adxudicación dos traballos.

Constitúe pois este feito o primeira incumprimento das promesas da nova Xunta para con as nosas comarcas en materia de obras. E por iso toca sacar a primeira amonestación. Ben é certo, non obstante, que se poden alegar atenuantes, coma o feito de que se teñan presentado diferentes obstáculos ó anterior concurso, comezando polo recurso dunha das empresas perdedoras, continuando pola sempre inestimable “axuda” da Voz de Galicia poñendo en dúbida a necesidade da obra, pasando pola oposición do PSdeG, e rematando por unha crise económica que está obrigando a revisar todas as inversións previstas. Pero os feitos son os feitos.

E falamos de primeira amonestación porque, por sorte, Feijoo está aínda a tempo de cumprir se, coma non se cansan de repetir os seus “boys”, a autovía da Costa da Morte é prioritaria, que se fará sí ou sí nesta lexislatura (coma así se ten aprobado), que o novo retraso será de 8 meses, e que se aplicará un novo modelo de concesión máis barato e máis acorde á nova situación financieira. Se é así, todo quedará nun contratempo. Por iso poñemos a contar o cronómetro e habémonos ver de novo dentro de 8 meses, para comprobar se non fan falta máis amonestacións.