... As orellas ó lobo

Nesta impasse que vivimos en torno ó proxecto do parking-centro comercial da Praza do Concello, tódolos síntomas que se perciben son reveladores de que o goberno está perdendo a batalla da opinión pública a pasos axigantados. Só así se explica que, despois de moitos meses sin ningunha información nin opinión dos responsables municipais, tivera que sair á palestra un modesto concelleiro para dar a cara polo goberno. Non foi (cantaría moito) o de urbanismo, Sr. Andrade, artífice deste tinglado. Non se atreveu tampouco o alcalde, que a estas cousas non se baixa. O portavoz do PSOE, Sr. Viña, tampouco considerou convinte meterne nestes berenxenales, non vaia ser que lle pase factura. Nin sequera o concelleiro de comercio, ó que lle toca o asunto directamente. Non. Tivo que ser o concelleiro de Emprego, Manuel Trigo Cancela (PSOE), o que publicase onte unha Tribuna Aberta en La Voz de Galicia (“Carballo merece esta oportunidade”) para defender ó goberno e o seu proxecto. Esto sería impensable hai uns meses, cando ata La Voz daba por sentado que todo o mundo quería o que quería o goberno, e o goberno nin se molestaba en defender o seu proxecto (xa o defendía La Voz por el). Pero agora parece que lle viron as orellas ó lobo.

Aínda que, desgraciadamente, estamos nunha vila bastante apática, parece que, finalmente, cando lle dan oportunidade de manifestarse á xente, esta non ten pelos na lingua. Así o comprobamos neste blog, a través dos comentarios dos lectores e, sobre todo, nas dúas enquisas sobre o asunto que se iniciaron o 22 de decembro pasado, e nas que levan participado máis de 250 persoas. Para nós non existe dúbida de que a nosa iniciativa foi a que “obligou” a La Voz de Galicia a facer outra similar a pasada semana. E os resultados das dúas enquisas, a de La Voz e a de CD, foron tamén moi similares: maioritariamente, os carballeses e carballesas non queren o proxecto que pretende este goberno para a Praza do Concello. Estas enquisas son as que están na orixe do artigo de onte.

Básicamente, os cidadáns achácanlle ó goberno: desinformación, intereses ocultos, pelotazo urbanístico, perda de aparcamentos gratuitos (zona azul), regalo de suelo público a empresas privadas, perda de espazos verdes e zonas de lecer, etc.. Pero ningún deses razonamentos e pegas merecen a atención do concelleiro de Emprego no artigo que comentamos. O Sr. Trigo pretende que teñamos unha fe ilimitada na súa bondadosa xestión e lle firmemos un cheque en blanco ó goberno. Non dá nin un só argumento que rebata as dudas e preocupacións dos que opinamos que o mellor que se pode facer co proxecto do goberno é guindalo á papeleira: nin se refire á perda de espazos públicos na Praza Municipal (cerca de 1.000 m2 de perda); nin fala da perda de aparcamentos gratuitos; nin lle extraña que só presentaran oferta as mesmas persoas (das que nunca se quixo nunca decir o seu nome) que promoveron o estudio de viabilidade. Non. O concelleiro sólo nos amenaza con que “oporse a estas melloras é ir en contra do progreso de Carballo”, coma se só el tivera gardada a esencia do que é “o progreso de Carballo”. Vennos decir que "todo será moi bonito". Pídesenos que creamos no que non se ve e ignoremos o que sabemos. A eso chámaselle ter fe.

Señor concelleiro, señores do goberno tripartito: non nos pidan fe: déannos información veraz e completa, pídannos a nosa opinión e despois acaten o que decida a maioría. Ó contrario, chámaselle paternalismo ou absolutismo.

Pero o máis grave non é que nos pidan fe como o Papa lla pode pedir ós seus fieis. O máis sangrante é que, lonxe de dar explicacións ou rebatir os explicables reparos da cidadanía con datos contrastables, ó Sr. Trigo Cancela non se lle ocurre mellor argumento para opoñerse ás críticas que o seguinte: "¿pódese criticar o que non se coñece?" Chapó. Agora xa entendemos porqué o goberno non quere dar información.



Enlaces relacionados:

O concurso do parking-centro comercial aínda pode ter marcha atrás