Elvis has left the building

Esta é unha das máis famosas frases da historia da música. Cando Elvis Pressley remataba un dos seus concertos, ou acudía a un plató de televisión, unha multitude de fans se agolpaba fronte ós accesos a camerinos para lograr o seu autógrafo ou simplemente tocar ou ver máis de preto ó “Rei do Rock”. Nese momento, ante o perigo da avalancha, sempre aparecía unha voz en off que anunciaba ós asistentes que “señoras e señores, Elvis abandonou o edificio”, para dese xeito calmar ós máis exaltados e botar para atrás ós curiosos.

Salvando as enormes distancias de protagonista e situación,... algo parecido debeu de pensar o alcalde carballés Evencio Ferrero a propósito da nova convocatoria para analizar a documentación presentada por Surtiser, o xoves día 1. Porque xustamente o venres 2 Evencio marcha cara a Uruguai para realizar unha xira, non de concertos, senón de toma de contacto coa comunidade carballesa do outro lado do charco.

En todo caso, a cita do xoves será de novo presidida por Ferrero, e non se trata precisamente dun plato de gusto. Máis ben, e como indicaba a semana pasada Xosé Manuel Lema, o goberno local tense metido nun calexón sen saída. Porque se non se otorga o contrato, o principal proxecto desta lexislatura quedará en nada, e os responsables municipais pasará a historia coma os primeiros que constrúen un túnel invisible, inaccesible, e que non sirve para nada. E se se otorga o contrato, as sospeitas sobre as circunstancias estrañas do proceso irán aínda a máis, e ameazarán con rebasar os límites municipais para converterse nun escándalo a maior escala.

Pero pase o que pase, ó día seguinte ó resultado da apertura, unha voz en off anunciará que “Evencio has left Carballo”, e terán que ser o seus colegas de goberno os que dean as explicacions pertinentes. Eso sí, parece ser que contaremos con información ó día da ruta polo Uruguai, xa que o propio alcalde prometeu que sería “con luz e taquígrafos”.