Amigos para siempre

Cantaban os Manolos nas olimpiadas de Barcelona 92, e cantan os membros do goberno local de Carballo. Pese a que nas últimas datas poidemos escoitar a Manuel Andrade atacar ós seus socios do BNG, ó BNG atacar a Andrade, e o PSOE outro tanto, e pese a que un concelleiro do CDI desobedeciu directamente as ordes do alcalde e montou un monumental escándalo a nivel nacional coa idea de albergar un almacén de residuos nuclerares, Evencio Ferrero ve as cousas doutro xeito.

Tal e como recolle hoxe A Nosa Costa, o munícipe afirma que “somos un goberno cohesionado con momentos concretos de diferencias”, e que a situación actual ven derivada de que “os cidadáns decidiron isto e repartiron así as cartas”. Curiosamente no noso blog xa fixeramos antes algún símil co tema dos xogos de mesa, porque en efecto a situación da política carballesa aseméllase máis a un partida de póquer ou de mus que a outra cousa. Precisamente por iso, porque nos xogos de cartas o engano é un arma fundamental, nós preferimos ser escépticos con este tipo de declaracións, porque quen sabe se hai ases escondidos na manga, e quen sabe qué astutas xogadas se poden estar preparando.