"Se non chega a ser por nós…"

Con frecuencia, os aparatos centrais dos partidos políticos semellan actuar de forma prepotente sobre os seus peóns municipais. O feito de que se atopen en rangos superiores e conciten máis interese mediático failles crer que saben máis ou están máis capacitados que os seus “mandados”, os que precisan da súa axuda para saír adiante. E por iso, a miúdo entran en casa allea coma un elefante nunha cacharrería.

Proba diso é a noticia que hoxe podemos ler na prensa local. Semanas despois de que a polémica sobre o cemiterio nuclear pasase de longo, e cando xa case ninguén a lembraba, o deputado nacionalista Carlos Aymerich ven a Carballo a remover de novo o tema, e a deixarnos un punto de vista do asunto certamente novidoso:

“…aunque descartó la posibilidad de que Galicia pueda albergar una instalación de esta naturaleza, se felicitó de que el regidor de Carballo sea de su formación: «Non quero pensar que tería ocorrido se o alcalde non fose do BNG», afirmó.”

Para rematar a faena,... o responsable comarcal do BNG, Xosé Regueira, destacou o compromiso do goberno de Carballo co medio ambiente, e dixo botar en falta «un pronunciamento do PP, o PSOE e o CDI sobre o fondo da cuestión».

Vaites, vaites. Ó final vai resultar que a culpa era do PP (único partido da oposición) ou do PSOE (que non tomou parte no tema e non ostenta a alcaldía), e menos mal que temos un goberno presidido polo BNG, porque se non a solicitude de información que fixo ese mesmo goberno, podería ter acabado mal por parte dese mesmo goberno. Por certo, se o BNG non se fía dos seus propios socios nun asunto tan imporante, ou dun concelleiro en particular, ¿qué fai gobernando con eles, e manténdoos no seu posto? Debe ser que, cando un se senta no sillón da alcaldía, xa non pode despegarse.