Calabazas

Bill acudiu á súa cita con Andie coa máxima ilusión, esperando que desta si se namorase del e desa forma deixar de vivir atrapado no tempo, revivindo unha e outra vez o mesmo día. Pero foi que non. Andie deunos calabazas, e esta mañá a radio volviu a sonar coma sempre co “I`ve got you, babe”. Seguimos inmersos no eterno-retorno do proxecto do centro comercial e seguimos coas ganas de saber cal é a proposta e a oferta que a unión de empresas presentada nos fai ós carballeses.

Porque, para os que aínda non o saiban, a reunión da mesa de contratación de onte acabou coma sempre: a empresa Inversiones Benal (segundo o PP, a mesma que Surtiser) non acreditou cumprir cos requisitos esixidos. Para disgusto de Manuel Andrade, o secretario e a interventora municipais déronlle a razón ós argumentos da oposición, pero segundo a prensa local semella que a súa opinión non se tivo moi en conta. O resultado é que á empresa concursante se lle vai requerir de novo (e van...) para que nun prazo de 10 días aporte a documentación que falta.

O PP deu unha rolda de prensa na que aclarou os seus argumentos. Alberto Sueiro e Juan Carlos Castro denunciaron que era a primeira vez na historia do Concello en que se concedía a subsanación dunha subsanación, dando 10 días cando antes se deran 3, cando eses 3 días eran improrrogables, e cando non se presentou nada do que se lle solicitaba. Para os populares… a cuestión é que, aínda que Aldesa cumpre cos requisitos, nunha UTE as dúas empresas teñen que cumprilos, e non sucede así con Benal. Sueiro considera que se trata dunha adxudicación política que ten sair adiante contra e vento e marea, e contra o criterio dos funcionarios municipais, pregúntase qué futuro pode ter unha obra para a que non hai consenso e que hipoteca Carballo e afirma que “hai unha implicación directa entre persoas do goberno e dun grupo empresarial, detrás de Surtiser e Benal. O mesmo sempre, xa desde o principio, e incumprindo tamén o pliego xa desde o principio”.

Pola parte do goberno, Andrade dixo que o voto en contra de secretario e interventora foi “un voto estraño, para non mollarse, non explican o seu voto”. Ferrero dixo que “o goberno municipal entende que Carballo necesita un aparcamento e un espazo comercial como referencia do centro”. Ambos criticaron a postura do PP por considerala “obstruccionista”. Da postura do secretario e da interventora non dixeron nada.


Enlaces relacionados:

Cita con Andie