El Pocero de Carballo?

Francisco Hernando, alias “El Pocero”, é unha das personaxes máis famosas da España da última década. Este peculiar constructor, home feito a si mesmo que comezou facendo pozos e rematou multimillonario, fíxose famoso a raiz do seu proxecto de levantar unha macro-urbanización, ou mellor dito, unha nova cidade, en Seseña (A Mancha). Concretamente Hernando acadou licencia municipal para construir un supercomplexo urbanístico no que vivirían 60.000 persoas, situado no páramo deshabitado e sen servizos básicos dun concello de 6.000 habitantes. As acusacións de corrupción non se fixeron esperar, e “El Pocero” pasou a ser considerado coma o máximo exponente da cultura do pelotazo urbanístico na España dos 2000, un modelo económico baseado na construcción desaforada e sen sentido, con milleiros de vivendas baleiras, na especulación, na falta de zonas verdes e equipamentos, na escaseza de vivendas sociais, na agresión ao medio ambiente, en nun desenrolo “insustentable”. Ou cando menos, este era o discurso dunha boa parte da esquerda política e mediática, que, pese a afectar a concellos de todas as cores, responsabilizaba á dereita da situación. Claro que tamén hai quen di que as ideoloxías morreron. E para boa mostra o noso propio Concello. Xa nos chamaba a atención que o PXOM fose un “plan oculto”, e empezamos a saber o por que.

Hoxe coñecemos algúns dos detalles do informe que a Xunta ven de emitir sobre a revisión do Plan Xeral de Urbanismo que está a realizar o goberno progresista de Carballo. Chamalo “demoledor” é dicir pouco. Os técnicos de San Caetano flipan cando descobren que os Evencio boys planifican que a capital de Bergantiños vai duplicar a súa poboación en 12 anos. O departamento que dirixe o ¿socialista? Viña preve construir vivendas na próxima década para albergar a 31.000 habitantes máis dos que xa ten Carballo a día de hoxe, ata superar os 61.000. Todo isto no concello de España co prezo da vivenda máis barato e nun dos que teñen máis vivendas desocupadas. E non só iso, a Xunta critica que non se cumpren as necesidades de zonas verdes nin de vivendas protexidas, que se consideran como urbanas unha chea de núcleos nos que non existen servizos básicos, e que se ven ameazados varios espazos naturais. Resumindo, que si as cores políticas foran inversas, as voces que calificarían este plan de “especulatorio” (ou peor) serían un clamor.

¿Acaso hai algún “Pocero” en Carballo? ¿Terán que ver as “amizades perigosas” do alcalde? O que está claro é que ó goberno municipal carballés terá que dar moitas explicacións, e que moito vai haber que modificar este Plan para que poida sair adiante.