150 anos

Agradecemos a Vítor Recarei que teña subido a youtube as roldas de prensa que o BNG está a dar en Carballo. Unha boa forma de dar a coñecer o traballo da formación nacionalista que sen dúbida os outros partidos deberían imitar, e que nos da oportunidade de coñecer moitos outros detalles que a prensa local non adoita recoller.

En concreto a intervención de Ferrero ven a refrendar o contido do noso artigo da semana pasada a propósito da doble personalidade. Basta un simple intercambio do ámbito xeográfico: onde Evencio fala da Xunta e de Galicia, poñamos ó seu bipartito e a Carballo, e veremos como son totalmente intercambiables. Especial atención á seguinte frase: “…eses plans e eses proxectos (de equilibrio territorial) que tanto se leva falado e tan pouco se leva feito, e hai obras que hai case dous anos se colocou a primeira pedra, e o certo é que neste momento volvemos a estar en punto 0”. Non, non estaba a falar do PXOM, nin do hospital comarcal, nin da peaxe, nin das dúas galescolas, nin do parking subterráneo, nin da cidade deportiva do Bosque, nin do novo ambulatorio, nin do porto deportivo, campo de golf, etc… estaba a falar da autovía a Berdoias. Non obstante o alcalde carballés si que nos deixa unha nova aportación sobre a que paga a pena reflexionar: o atraso da Costa da Morte é secular e ademais é culpa da dereita porque, salvo pequenos parénteses, leva gobernando ¡150 anos! E nós que nos atrevíamos a pedirlle resultados tras 7,5 anos de alcaldía… coñécese que Evencio considera que apenas leva gobernando un 5% do tempo que precisa para levar a cabo os seus plans.