O PP insiste en acusar ó Alcalde de faltar á verdade, encubrimento e trato de favor

Nunha nota de prensa remitida polo PP de Carballo, o grupo da oposición insiste en que, no caso do concelleiro do BNG que fixo unha obra ilegal, “o Alcalde encubriu” e existiu “trato de favor” a ese concelleiro.

Alude o PP a que "existen datos máis que suficientes para afirmar que se mantivo un trato de favor e que non se actuou do mesmo xeito, nin se aplicaron as mesmas medidas que noutros expedientes.”

Entre eses indicios, segundo o PP…

… “o servicio de inspección urbanística non actuou coa dilixencia necesaria, máxime cando o feito denunciado afectaba a un membro do goberno municipal, tendo en conta que a inspección tardou máis de un mes en actuar , cando se pode demostrar que en expedientes urbanísticos motivados por denuncias de particulares das mesmas datas, a inspección realizouse nos días inmediatamente seguintes.”

Acusa ó Alcalde de “falta[r] á verdade” cando este afirmou que o PP tivera acceso á información. Para desmentilo, o PP recorda que “foi publicado pola prensa que tivemos que pedilo por escrito despois de que se nos negase o acceso ós expedientes en máis dunha ocasión, e sempre por orden do Alcalde.”

Engade tamén o PP que, no momento da denuncia, “non existía licencia de ningún tipo”, e por iso tamén “falta á verdade” o Alcalde cando afirmou “que se trata ´da obra dun particular que non se axusta á licencia´.”

Noutro párrafo, para desmentir o trato que recibía anteriormente o BNG, o comunicado di: “O Sr. Alcalde falta a verdade cando afirma que en outro tempo non se lle daba acceso á información, sendo absolutamente falso, e a proba é que incluso fotocopias de documentos municipais (facturas) apareceron publicados na revista do BNG (O Anllons).”

Finalmente, o PP pide “que desde o Goberno municipal se dean tódalas explicacións á cidadanía e se aclare con exactitude cal foi a actuación do Sr. Alcalde e do Concelleiro de Urbanismo neste asunto", ó tempo que di “lamenta[r] a actitude do Alcalde querendo ocultar unha obra ilegal, ocultando a información ós representantes da oposición, intentando culpar ós servicios técnicos e intentando minimizar unha acción que desde todos os puntos de vista constitúe unha infracción urbanística, contra a que a Lei prevé as correspondentes sancións.”


Anteriores noticias relacionadas:

Un ex-concelleiro do BNG de Carballo fixo unha obra ilegal sendo edil
Nota do PP sobre a obra ilegal do concelleiro do BNG